'n Perspektief op
die lewe
Oplossings vir die
kwellings van hierdie wêreld
Die
mens van vandag het beslis rede om ongemaklik en selfs vreesbevange
te voel. Die wêreld is vasgevang in 'n groeiende maalkolk van
morele-, ekonomiese-, geregtelike- en politieke onstabiliteit wat
alle dimensies van ons menswees beïnvloed. Daar is diefstal, bedrog,
verkragtings, moord, korrupsie in ons onmiddelike omgewing. Op die
wêreldskaal is daar oorloë, oorstromings, droogte, hongersnood, en
finansiële onbestendigheid wat vir almal lê en loer.
Hoe
nader ons beweeg na die einde van die tyd, hoe erger sal dinge word.
Maar hoe raak dit ons as gewone mense?
Daar is maar net één
Weg deur die lewe. Dit is ook die Weg wat baie van ons se voorouers
bewandel het. Langs hierdie Weg vind ons ook die oplossings vir ons
eie probleme en dié van 'n verlore gaande wêreld.
Hierdie webwerf
poog om vir elke persoon nuwe hoop vir die toekoms te bring. ‘n
Groter hoop as wat die wêreld ooit kan verskaf. Ons vertrou dat die
inligting wat hier geplaas is en nog geplaas sal word vir jou ‘n
beter perspektief op die lewe sal bied en vir jou ook persoonlike
vreugde en innerlike vrede sal verskaf.
Blaai gerus deur ons
bladsye en kyk wat daar vir jou aangebied word. Lekker lees!
Plaas asb jou naam op ons verspreidingslys indien jy elke weeksdag
Gedagte vir die dag en Boodskap vir die dag per epos wil ontvang.
Dit is gratis
Gedagte vir die dag
Ek weet dat ek Iemand naby my het
op wie ek, sonder voorbehoud, my vertroue kan plaas
en dit is dít wat my rus en krag gee.
- Edith Stein (1891 – 1942 te Auschwitz) -
Boodskap vir die dag Tyd vir verposing Dit is byna 10 jaar gelede dat ons as gesin die moeilikste tyd in ons lewe deurgemaak het. Dit was toé dat ek met Die Weg begin het: as vertroosting vir myself en om vir my rigting te gee in die donkerste donker van ons lewe. Dit het egter nie lank geduur voordat ek reaksie daarop ontvang het en die geestelike nood van ander mense my aangegryp het nie. Na vele versoeke het ek vanaf 2011 begin om dagstukkies te publiseer. As ek nou terugkyk, kan ek in alles wat ek tot hede beleef en gedoen het, die leidende hand van die Here sien. Die Weg het baie tyd en opoffering geverg: dit was die webwerf en die rekenaarstelsels wat in stand gehou moes word, navorsing wat gedoen moes word, dagstukkies wat geskep en uitgestuur moes word, die administrasie en eposse wat beantwoord moes word...... Maar die Here wat ons roep om in sy diens te staan, rus ons toe vir die werk wat gedoen moet word. En nou, na baie jare se arbeid, het die tyd vir my aangebreek, en is dit ook nodig, dat ek 'n kort verposing moet neem om self weer tot rus te kom. 'n Rus wat ek ook dankbaar uit die Here se hand ontvang. Om self weer net rustig in die Here se nabyheid te verkeer, weg van alle drukte. Dit beteken nie noodwendig om weg te gaan nie, maar om rus in myself te vind en nuwe krag te verkry vir dít wat in die toekoms op ons mag wag. Dit geld vir elkeen van ons: maak nie saak waar jy is nie, jou rus vind jy alleen by die Here omdat Hy by jou is. Soos Edith Stein gesê het: “Ek weet dat ek Iemand naby my het op wie ek, sonder voorbehoud, my vertroue kan plaas en dit is dít wat my rus en krag gee.” (Edith Stein het in 1942 in Auschwitz omgekom). Neem intussen gerus die tyd en lees weer elke dag van die dagstukkies en artikels wat op die webwerf gepubliseer is.
Tot ons weer gesels. |
----------------------------------------------------------------------------------
Kopiereg©
Materiaal op hierdie webwerf mag gebruik word op voorwaarde dat daar 'n duidelike verwysing na die outeur sowel as die webwerf www.dieweg.co.za by sodanige materiaal geplaas word.
Geen materiaal op hierdie webwerf mag direk of indirek vir kommersiële doeleindes gebruik word nie.
Kopiereg: Lukas du Preez (dieweg.co.za). Ontwikkel op w3.css