Die Weg

'n Perspektief op die lewe

Oplossings vir die kwellings van hierdie wêreld

Die mens van vandag het beslis rede om ongemaklik en selfs vreesbevange te voel. Die wêreld is vasgevang in 'n groeiende maalkolk van morele-, ekonomiese-, geregtelike- en politieke onstabiliteit wat alle dimensies van ons menswees beïnvloed. Daar is diefstal, bedrog, verkragtings, moord, korrupsie in ons onmiddelike omgewing. Op die wêreldskaal is daar oorloë, oorstromings, droogte, hongersnood, en finansiële onbestendigheid wat vir almal lê en loer.

Hoe nader ons beweeg na die einde van die tyd, hoe erger sal dinge word. Maar hoe raak dit ons as gewone mense?

Daar is maar net één Weg deur die lewe. Dit is ook die Weg wat baie van ons se voorouers bewandel het. Langs hierdie Weg vind ons ook die oplossings vir ons eie probleme en dié van 'n verlore gaande wêreld.

Hierdie webwerf poog om vir elke persoon nuwe hoop vir die toekoms te bring. ‘n Groter hoop as wat die wêreld ooit kan verskaf. Ons vertrou dat die inligting wat hier geplaas is en nog geplaas sal word vir jou ‘n beter perspektief op die lewe sal bied en vir jou ook persoonlike vreugde en innerlike vrede sal verskaf.

Blaai gerus deur ons bladsye en kyk wat daar vir jou aangebied word. Lekker lees!

Plaas asb jou naam op ons verspreidingslys indien jy elke weeksdag
Gedagte vir die dag en Boodskap vir die dag per epos wil ontvang.
Dit is gratis

strepie

26 Julie 2017
Gedagte vir die dag

Niemand sal ooit weet van die
geheimenisvolle, innerlike groei
wat kan kom deur lyding en hartseer nie.
Al wat ons weet
is dat elke persoon se lewe onbetaalbaar is -
dat elkeen kosbaar is vir God.
- Christoph Probst (1918 – 1943) -
 

strepie

Boodskap vir die dag

Ons onverganklike burgerskap

“Ons burgerskap is egter in die hemel, vanwaar ons as Verlosser verwag, die Here Jesus Christus” - Filippense 3:20 (Direkte-vertaling).

Paulus is in Tarsus gebore. Dit was die hoofstad van die Romeinse provinsie Silisië. Daarom kon hy, alhoewel hy 'n Jood was, op sy Romeinse burgerskap roem (sien Hand 22:3 en Hand 22:28). Dit is waarom hy, toe hy gevange geneem is, hom op die keiser beroep en versoek het dat sy saak voor die keiser gebring moes word (Hand 25:12).

Toe Paulus die brief aan die Filippense geskryf het, was hy 'n gevangene in Rome. Dit was  gedurende die bewind van keiser Nero, 'n gewelddadige en sadistiese heerser wat selfs sy eie ma vermoor het. Dit was dus vir Paulus duister wat die toekoms vir hom ingehou het. Hy was onseker of hy vrygelaat sou word en of hy aan die hand van die keiser sou sterf (Filip 1:21-22). Hy het heel waarskynlik toe al besef dat hy nooit vrygelaat sou word nie, want hy skryf 'n jaar of wat later aan Timoteus: “Wat my betref, ek word alreeds as drankoffer uitgegiet. Die tyd van my dood is voor die deur.” (2 Tim 4:6).  In die aangesig van die dood dink hy egter nie aan sy Romeinse burgerskap nie, maar wel aan die burgerskap wat hy in die hemel het. En dit is vir hom 'n groot troos. Vir Paulus is Jesus Christus groter as Nero. Ons het dieselfde gesindheid ook by Dietrich Bonhoeffer gesien (sien vorige boodskap). Daarom sê Paulus: “Dit is 'n betroubare woord: As ons saam met Hom gesterf het, sal ons ook saam met Hom lewe; as ons in die geloof volhard, sal ons saam met Hom regeer; as ons Hom verloën, sal Hy ons ook verloën; as ons ontrou is – Hy bly getrou: Hy kan Homself nie verloën nie.” ( 2 Tim 2:11-13).

Ook ons aardse burgerskap sal een of ander tyd tot 'n einde moet kom. Hoe vertroostend is dit dan om te weet dat ons die burgerreg van die hemel het! Maak nie saak watter regte en geleenthede ons in hierdie lewe verloor nie, ons burgerskap van die hemel het ons deur Jesus Christus ontvang. Ons is burgers van die hemel en ons tuiste is by God.

Christoph Probst, 'n 25 jarige mediese student van München in Duitsland, is op 22 Februarie 1943 deur die Gestapo onthoof omdat hy kopieë van 'n strooibiljet met anti-Nazi propaganda uitgedeel het. Met sy teregstelling was sy woorde: “Ek het nie geweet dat dit so maklik is om te sterf nie. Daar is geen haat in my nie. Moenie vergeet dat die lewe niks anders as 'n groei in liefde en 'n voorbereiding vir die ewigheid is nie.”

- dw-

(Bronne: Wikipedia; Neukirchener Kalender 2017).
 

Boodskap argief


----------------------------------------------------------------------------------

Kopiereg©

Materiaal op hierdie webwerf mag gebruik word op voorwaarde dat daar 'n duidelike verwysing na die outeur sowel as die webwerf www.dieweg.co.za by sodanige materiaal geplaas word.

Geen materiaal op hierdie webwerf mag direk of indirek vir kommersiële doeleindes gebruik word nie.

 

Kopiereg: Lukas du Preez (dieweg.co.za). Ontwikkel op w3.css